「痛楚」係一種好個人主觀嘅感覺，相信每人都試過腰酸背痛、頸梗膊痛、或頭痛等症狀，通常呢類痛楚係短暫性，只要多加休息，痛楚會有所好轉；不過，如果痛症持續或間歇性咁感到痛楚，難以用藥物根治，便有可能係患上「心理痛症」。心理痛症可能同情緒問題或者壓力有關，係情緒病嘅一種。
「心理痛症」係指由心理同情緒所引發嘅身體症狀或疾病，壓力係心理痛症嘅主要成因。人嘅生理同心理係互相影響，喺壓力之下，大腦會分泌唔同嘅化學物質，透過神經系統及內分泌系統，傳送到全身器官，出現一連串嘅生理反應，去對抗壓力。隨住痛楚而來嘅消極負面思想、行為及負面情緒或反應等，都會令痛楚加劇，形成惡性循環。
「心理痛症」病人可能會將痛楚的根源、強度和影響放大，焦點經常放在痛楚上，這種「災難性思想」令佢哋產生更多擔憂、恐懼及沮喪嘅負面情緒；擔心痛楚加劇及因痛楚而形成嘅情緒低落，令他們減少大部分嘅工作、日常活動及社交，變得更弧立無援；而且，長期減少活動令肌肉繃緊，關節退化，久而久之令痛楚加劇。由此可見，「心理痛症」係需要身體及心理兩方面嘅治療配合。